الشآيب اللي فارقت عينه النـوم .. - مطلق فالح

الشايب اللي فارقت عينه النوم
عيا يجيه النوم في كل الاوقات

لاقلت بشرني عن احوالك اليوم
يقول حال اللي عليه الزمن فات

غديت مثل اللي من الداب مسوم
سمه لجى بين العروق السخيفات

تساق بي دراجتي تقل منجوم
من عقب مالي في خلا البيد سجات

خلوني اجلس باقي العمر ما اقوم
ما باقيلي فالعمر كثر مافات

ما يلحق الرجلين فلي بقى لوم
ولا فاد فالرجلين طب الخواجات

ياما قطعنا فوقهن ديرة القوم
وياما رقنبي فوق روس المنيفات

وياما سرنّبي ليلة مابها نجوم
وكم ليلة ٍ شالن حمولن ثقيلات

يوم المراجل دونها يقصر الحوم
من دونها روس السباع المجيعات

يشهد لهن في حامي القيض سلوم
لاشدو حبال السواني لذروات

العين ماذاقت ليا وردت النوم
من الغيوب لطلعت الشمس خذ هات

اليا اقبلت سود ٍ تقل ناشي غيوم
ولابركت تشبه جبال السروات

ماجات حب يدين ومتون وخشوم
ياما وردنا دونها حوض الاموات

نمشي بها درب الحيا صيف ووسوم
شرق الحفر والا شمال القريات

ولا رد عنها اللي من المال محروم
نبا العوض من رب سبع السموات

واليا نزلنا نعتلي راس مزموم
حتى الضيوف تشاهد البيت لاجات

والجار معنا لو قسى الوقت محشوم
لوهو من اقصى القوم ينسى القرابات

وخوينا عن شدة الطرق مخدوم
تهابه اعدانا سنين ٍ طويلات

حنا الجشوش اهل الوفا والنقى دوم
سلم ٍ مع الحيين من ورث الأموات

ماضي بلا حاضر مثل بيت مهدوم
وحاضر بلا ماضي خيال وحيالات

هذاك وقت ٍ غير قبل امس واليوم
وقت الشدآيد غير وقت الشهادات

اليوم وقت النوم والرزق مقسوم
يبي الشكر يا متابعين القناوات

واخير لاصليت واجهدت فالصوم
وقضيت فرضك يوم وقفة عرفات

مناسبة القصيدة

قصيدة ( بوالدي ) عندما تكرم الأمير سلطان بإدخاله في مستشفى العسكري لأجراء عمليه بركبتيه .. واثناء مرافقتي معه حكـى لي عن شدة تحمله للمشاق في السابق مع إبله الذي ورثه من ابيه الشيخ سويد بن دبلان وهي من اشهر الأبل واكثرها قبل الحكم السعودي وبعدة . وكتبت هذه الأبيات .. متمني ٍ له الشفاء العاجل .
© 2023 - موقع الشعر