ما حلا عقب العشا شبة النار - عضيب بن شلاح الحربي

ياما حلا عقب العشا شبة النار
عقب الهجوع لا رقد كل كوبه

بقفرية ياعبيد يودع له اشعار
وسواة فنجال يشوق بصبوبه

حبه على المطلوب من بن وبهار
يعجبك بالفنجال صبغه وروبه

كيف يجوز لشارب الكيف والكار
لو دوروا به غمزة ما لقوبه

في مجلس فيه المشاكيل حضار
بغيبة ردي الحظ عنهم بنوبه

اللي يخزوون المسير بالانظار
تكاظموا واللي جليس شوشوبه

تلافتوا على بعضهم بالانظار
وتغامزوا مابينهم وضحكوبه

الناس فيهم يافتى الجود هذار
مسترحل لبليس زين ركوبه

عراض غرة مسلم غافل غار
يعرضه للناس لو ما حكوبه

دايم لغرات الاجاويد عقار
يظهرعيوب ولا درى عن عيوبه

وفيهم تبيني لايسرك ولاضار
ماغير يحسب للربايع ضروبه

وفيهم حصيني قبوع قمار
يوصف على ماقيل به طير ذوبه

وفيهم بليهي على الكود صبار
يصبر ولو زادت عليه الصعوبه

لا جا زمان فيه غلين الاسعار
غدى لربعه بالمكاييل جلوبه

وانا جا نهار الضيق بالموسم الحار
يرخص بعمره مايعد محسوبه

© 2024 - موقع الشعر