صـفـحـتـن شـقـيـتـقها ..!! - احمد الكندي

صفحتن شقيتها من دفتري راحت سرينا
وانتهت يا لايمي لا .. لا تعاتب مايفيدَك

عافنا دربَ المحبّه غارقه كلّ السّفينا
دامكَ المعروفِ ماتحفظْ جحيدن حقِِّ سيدك

لا تعاتب لا تدوّر لا تراسل لا تجينا
لا تفكّر لا تدبّر لا تخطّط مانريدك

كم عطيتك من فرَص يا للأسف ماقد جنينا
غير ِ همّن من وصالك والتعب دايم نشيدك

كم نسامح كم و ِكم نمْشي ورى زيفك مشينا
وانتَ لاهي في ظلالك كلّ يومَ الغيْ يزيدك

دايمن تكْذب و ِتلعب دلّعك وقتك علينا
خايبن كلّ الرجى مافي أملْ يعْمَر رصيدك

نرفعك دايم و ِتنزلْ خايبن بك ما هقينا
من عوايدكَ الحماقه طبع ِربّك بهْ يكيدك

لا تظن أرجع بيومن لا تعيدَ اللي حكينا
خلّها يمكن بلانا لعبتن قذره تفيدك

بيْدكَ الشّينه قتلتَ اللي سَوَى نحنا بنينا
ياعجايب كيف ِترمي نعمتن كانت تريدك

انتهت كلّ العلاقه وانتهى حبّك صحينا
مايفيدَ الكي معَ الميّت ولا ينفع يعيدك

© 2024 - موقع الشعر