حي الكـلام - عجير بن بلاّج الحزيمي

حي الكلام اللي عقود ٍ ماسي
عقود ماس في ثمنها كليفه

من عرفنا ما قالها باختلاسي
ويزداد من درس الحياة تعريفه

قول اللبيب اللي بصدره حماسي
واجداه في بعض المواقف نزيفه

وعينه قزت ما هملجت بالنعاسي
وهجوس قلبه خلت الراس ليفه

لوحس في بعض التعب والعماسي
عينه تطالع في الخيال ورفيفه

وعروق كبده في بعضها يباسي
وهواه من دونه بحور مطيفه

جدد فيه الجروح الدراسي
في حب من زاد الجروح الطفيفه

شرب الغرام وذوقنه بكاسي
وطاويه حبه مثل طوي الصحيفه

وأصبحت أفكر في رجايه وياسي
الله شفى راع العيون الكفيفه

وهاضت هواجيس القلوب النواسي
ولا فرق في راع الشداد ورديفه

أبغى الجلوس ولا حصلي جلاسي
ودنياي من ضيم الليالي قصيفه

أصارع الدنيا بليا قياسي
ومر تعاندني ومر عسيفه

دنيا تتعب مبعدين المماسي
زحول الرجال أهل النفوس الشريفه

ورجل على غير المهمات عاسي
تومي به الدنيا وماي السفيفه

ناخذ من الدنيا تجارب رماسي
ومن مارس الدنيا يشوف الكسيفه

الله يجنبنا طريق الفلاسي
وفي رغبتك نكسب عديم الوصيفه

غلاك عندي والعيون متواسي
وقدرك ما أرضي عليك المحيفه

وحبست نفسي في هواك انحباسي
حبس السجين اللي وراه الكتيفه

وان صار في بعض العلوم احتواسي
انشوم عن دار المحل للمريفه

والذيب رزقه في الظلام الدماسي
وعنده صعيبات الليالي طريفه

لا يخدعنك زاهيات المكاسي
نجل العيوب اللي قذلهن كثيفه

وان كان وثقة المحبة يساسي
ومن بينكم سر العلوم الذريفه

شمس الضحى ينزال عنها القطاسي
ولابد من بعد الشروق اتهريفه

وان صار في حبل المود التماسي
والناس راحت دون شفك لفيفه

بالعرف والحكمة وعلم رياسي
وجاه الرجال اللي تفل العطيفه

اللي لهم في الواجبات اقتباسي
قبس المدافع في الحروب العنيفه

تنحل لو جاء في الأمور التباسي
ولا عاد تلحقني علوم وحسيفه

وترتاح من بعد التعب والمآسي
ودارك تنور بالربيع وخريفه

وانا طويت عن الموده لباسي
وانكفت مثل اللي بعيد نكيفه

تمت واصلي عد طلع الغراسي
وعداد سكان الحسا مع قطيفه

© 2024 - موقع الشعر