عـيـون الحبيبـه - عبدالله بن أحمد

هالحين صارالعيد ياصاحبي عيد
يوم النظر شاهد عيون الحبيبه

هالحين شفتها شوف بنت الاجاويد
في داخلي هاجت مشاعر عجيبه

ذيك العيون اللي بها السحر تمهيد
والشعر ناعم .. والخصايل رهيبه

ربي حماها من عيون المحاسيد
هيّ العبير ونسمة ٍ لي رطيبه

يامرحبا ياداعج العين والغيد
هتفتلك من داخلي بكل طيبه

يا مرحبا بك عد نغمات تغريد
ياللي محبتكم في نفسي قريبه

انتي القمر والنور من وجهك يزيد
اسفرتي وانورتي الليالي الكئيبه

غنت لك طيور المحبه أناشيد
وخضّرت بعيني أراضي خصيبه

شفتها عيونك واصبح العيد لي عيد
وصاح النظر أهلا ً هلا بالحبيبه

© 2023 - موقع الشعر