الهوى

لـ بدر الظاهري، ، بواسطة سالم الفروان، في غير مُحدد

الهوى - بدر الظاهري

الهوى اللي هب كسر شبابيك الحنايا
والله أنه ناوي ٍ من ورى التكسير نيه

علموه إن ما بقى في معاليقي سرايا
علموه إن المعاليق من مبطي خليه

أذكر اللي باقي أيتام وأطفال ٍ برايا
ضاقوا بصدري وسلمتهم سيف ومطيه

الجهاد اللي عشان الغلا .. كلها خطايا
مير قلب الأدمي ما يحب إلا الخطيه

صاحبي وإن كان وده يقدم لي هدايا
والله إني ما أعتبر غير جياته هديه

ما ورى نجل السحايب مقاصيد ونوايا
كود غيث ٍ لا نزل تحضنه صحراء يديه

والله إني لا أعتزى الشوق كسرت المرايا
والله إنه لاأعتزى الشوق سكينه طريه

الحبيب اللي خياله ملى كل الزوايا
أذكر إنه يوم سافر نسى الدنيا عليه

راح كله .. بس بالعين باقي له بقايا
صورة ٍ وإن جيت أجمع بها ضاع البقيه

صاحبي وإن هب .. كسر شبابيك الحنايا
وإن سكن ,, هبت رياح الفؤاد النرجسيه

© 2024 - موقع الشعر