تـلـوي ذراعــي

تهددني تبي ترحل "عبالك"تلوي ذراعي
ترى مثلك صعب إني أداري بالمرض "نفسه"

أموت ولا أنحنى راسي...جرحتك...هذي أطباعي
أرد الصاع لك صاعين "ولسه شوفني لسه"

على بالك خياناتك تجر بموجها شراعي
أنا وربي إذا ودي أداري للهوى حسه

أبد لا تصدق قليبي...لعينه آخر أوضاعي
أنا ماذلني إلا خفوقٍ نبضنا جسه

درى إني نهيتك يوم تصده والهوى ساعي
وأنا ما همني قلبي ولا شيٍ به يدسه

أبحلف لو غدر مثلك وصار لطعنتك راعي
أتله من ضلوعي لين أطسه بالعنا طسه

لأجل يذكر معاناتي ويبقى للألم واعي
أبي يدعي بصلاواته عليك بكل شي حسه

وأبي تعرف ترى جرحك أبد ماكان له داعي
حقيقه "بيّنت"إنه نقاصه وبالطبع خسه

عرفتك وإنجلى ليلك...أبد لاتحاول إقناعي
أحرقك لو تفكر يوم تجيه بجرحك تمسه

إذا فعلا أنا خنتك...توكّل غيّر أنواعي
ظلمت القلب وش عقبه وشاللي باقيٍ لسه ؟

مادام إني بهالصوره أبد لاتكثّر أوجاعي
وإذا قلبي نسى قلبك وشاللي يمنعك "تنسه ؟"

ولكن إتضح إنك تبي بس تلوي ذراعي
وأنا تزحمني أشغالي وقلبي معتزل نفسه