بنت العرب

لا تمشيني على رايك ترى ماني سبيّه
بنت حر ومن هل الباس الكبير و لي كرااامه

ولا تحسب انّك ملكت السرج و لجام العبيّه
دام انا بنت الحصان اللي غدا شوره لجامه

اجتنب بنت العرب و احذف كلامك لاجنبيه
و اعرف انّي وقتها شيهانةٍ ماني حمامه

شيخةٍ ماني عجوزٍ من جواريك او صبيّه
افهم المعنى ترا في كلمتي شور وعلامه

ويا وجودي كلما غنّت همومي راعبيّه
وجد من ترجي سلامه ولا حصل درب السلامه

والله اني يوم اصدّق بعض خلق الله غبيّه
ما دريت ان بعض خلق الله كذوبٍ في كلامه

دايم اتبع نيتي و القلب في سنّة نبيّه
احسب ان الناس مثلي واثرهم سربة جهامه