يامل قلبن كاثرات وروده
والصادرات ليا عطشن وردنّه
مايتركنه لين يصفي ركوده
امّا ضونّه بالمسا صبحّنه
لين ألحقن بجمتّه من عدوده
شربن صراته والغريف تركنّه
قلبي صروف الوقت باحت سدوده
وان جا يخف الواقعه جر ونّه
جاهد همومه لين كلّت جهوده
واليوم بان المتّقي وأفضحنّه
العام يخفي علّته عن حسوده
واليوم صكّات الدّهر غيّرنه
من يوم في ّ الشيب بانت شهوده
قام يتلاوح بأوسط الوجه كنّه
نور الصباح اليا تبيّن عموده
قبل الشروق ودبّح الليل عنّه
والشيب نور ٍ للوجيه الندوده
يلزم على الرجال من كبر سنّه
من شبّ شاب وكل نبت ٍ وعوده
وشيب الوجيه البيض يحلى بهنّه
واليوم غرب الشيب جتني وفوده
حيّيتهن بإخلاص وأكرمتهنّه
أقفى الشباب موشّر ٍ دون عوده
من ودّع أيام الصبا ودّعنه
ماعاد باق ٍ كود ذكرا خلوده
بأقصى خفايا ضامري مستكنه
رسم الزمان ونقش بيضه وسوده
على سويدا القلب ميقاعهنه
يوم الشباب مثبت ٍ لي وجوده
ودّعت قلبي للبني وأهملنه
واليوم عفت الحب نقصه وزوده
مقفي وغيري مقبلين ٍ لفنّه
رجعت للي ترتجي الناس جوده
أرجيه عطفه والرضا والمحنّه
مرس الجبال النايفات ونفوده
على بساط القاع يعرف بهنّه
خلا ّق رزّاق البشر ومعبوده
واليا وَمر بالجود ماحدن يمنّه
يرد للكايد على الدين كوده
بأمره عواصيف الهوى طاوعنّه
أهلك ثمود وعاد وأهلك جنوده
وبعث نبي ّ ٍ سن للدين سنّه
يارب عبدك ماتشيله عضوده
مافاق لين إن الخطايا غشنّه
يارب حل الذنب وأطلق عقوده
وبدّل لي السيّات بأحسانهنه
ليا جا نهار ٍ ماتوجّل وعوده
تحصى النفوس وتوزن أعمالهنّه
واللي عماله صالحه ومحموده
ينزل مع الأبرار حور ٍ وجنّه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين