اول خضاره

يازين شوف البر في بعض الامرار"
"لامن درج سيله مع اول خضاره

مناسب(ن)جوه براد ولاحار"
"من منوة الي بالخلا له زياره

الي يشب الضو في صبح الامطار "
"يسرح براد اليوم بأول نهاره

والعصر له في حاجر فيه نوار"
"ومن الخليع من الحطب شب ناره

ويقدم الدله على جانب النار"
"فنجالها يجلي من الراس داره

والي شعلها من هل الكيف والكار"
"ومنقي حبه ومثلث بهاره

وخوة نشاما من طليقين الانظار"
"الي على بالك وزين مساره

القلب تومي به دواليب الافكار"
"مره قريب ومره تبعد دياره

لاشفت انا الاثار منها الحشافار"
"فرير طير زارع باعلى مطاره

يلعب به الهاجوس يمين ويسار"
"وبين الضلوع وكن تحته حراره

متذكر فرقا طويلين الاشبار"
"لا داج في المدهال جابه غياره

والي فقد ربعه مشاكيل وخيار"
"اهل الوفاء والعز واهل النعاره

يسرك الطيب ايلا صار ماصار"
"ولاالردي زوده وعرفه خساره