فرقة ميامي - هادي الرزقي

ياليل ياستر الذرا والاسامي
ليل النفوس اللي قليلٍ ورعها

اشوف نجمك ساهرٍ ماينامي
سبحان من سوّى النجوم وصنعها

تلمع كذا, في خندريس الظلامي
حتى طلع نور الضحى وابتلعها

لولا حلوم مفسرين الحلامي
ماصدّقت في حلمها اللي خدعها

سود الوجيه اللي غذاها حرامي
هيف النقا من جاعها ماشبعها

خدّاعة الطيّب بحلو الكلامي
ناسٍ تهين اشنابها في طمعها

اطيبهم اللي في قفص لتّهامي
مافيه سكّه خايبه ماتبعها

شلّة وبا منها الردا والملامي
حتّى سديم الغيل يشكي طبعها

في سلمها الطيب يسمّى حرامي
واكبر شريف اللي مساريه معها

عند الضحى تقرا عليك السلامي
والليل كلّه تايهه في ولعها

دايم تحلّى الصدق بين الأنامي
والزور كلّه بدعةٍ من بدعها

سود القلوب امجاذبات الغرامي
تتبع هوى شيطانها اللي جمعها

حطّت لها سمعه وقدر ومقامي
بين القلوب اللي خطيرٍ وجعها

ياهولة الله ياكبار الاسامي
ياللي خلقها قليلٍ سنعها

بعض الاسامي مثل فرقة ميامي
نسمع بها لكن مانستمعها

© 2024 - موقع الشعر