اسمعي ما قلـت

في يوم من الايام كان الشاعر نجر العصيمي
في الكويت ومر ببنتين وسمع إحداهما تقول

للاخرى ( انتبهي من ذا تراه بغى يصدم
عجوز قبل اسبوع ) فرد بهذه القصيدة:-

اسمعي ما قلت يابنت الرجالي
من هواجيس يصبحني قشرها

قالها نجر العتيبي بالكمالي
والبيوت المستقيمه ما كسرها

يا هني اللي من الهاجوس خالي
ما يصارع له امور ما قدرها

شيخة الزينات مدري من هبالي
مرت الشارع ونورنا قمرها

لبسها حشمه وممشاها اعتدالي
لو تمر الدبدبه يخضر شجرها

عين حر طالع ٍ والقاع خالي
كن زهر الورد في لبة نحرها

صبحتني مثل ابو زيد الهلالي
يوم عاند صبح القوم وكسرها

ان سكتنا جرنا تاج الجمالي
وان تكلمنا غرقنا في بحرها

صفقت قدحان غزلان السهالي
مثل راعي طبخةٍ قام ونثرها

واسمحوا لي يا كريمين السبالي
لين ابين عن شعوري من سكرها

تستحق بزينها كل المدالي
والصحافه عمرها ما اخذت صورها

من بنات البدو فرسان القتالي
لا نقربها ولا نبعد ديرها

يا عنود الصيد قولك سم حالي
يابعد قشراً تحودب من ظهرها

ما نويت ادعمك يا عنق الغزالي
لو تسدحني ويا طاني كفرها

والفرامل جاهزه والزين غالي
والبريك اما انفقع والا قهرها

وسرعتي وسطى وانا قايد مثالي
والمشاكل كلها عندي خبرها

وقسمة الله جاريه في كل حالي
واطلب المولى يعديني خطرها