العزوة - ناصر الهاجري_البدوي

خلها تبرق ورا الصمان وتسيل المسيله
دام خيال المهور العوب في الشدات منا

الزمل في مهجتي ممساه وهنيا مقيله
والله إنه من ظعنا راح يرعى في ظعنا

والله إني ما أتنازل عنك يا الصفرا الأصيله
دام لي راس يزوم ولي طواريق تغنا

يوم قالت يا حلالي قلت لبى أغلى حليله
قالت البارح جرى دمعي على الخدين لنا

قلت في ربك وريضان الزهر هذي وشي له
ماسقاها إلا غلاك اللي ربيناه وسكنا

صاحبي وافري جيب اصويحبك عقبك اويله
لا خلت من ضحكتك ذيك الصروح اللي تبنا

لا رحل حلم نزخرف له بيوت وننتمي له
وامحلت خر الطواريق ودنا الليل وتدنا

قبضيني يا الهبايب غرة الغيم وهميله
لين يرتع في خفايا الروح رعبوب زبنا

وارعدي بي يالرعود وفضفضي بي يا المخيله
واشرقي بي لا اظلمن ذيك الوجيه وكلحنا

واعتزي بي مثل خيال على عزوة خليله
ساعة يستنشق البارود كيف ويستجنا

المشاعر راهيه والدرب مخطور او يبي له
مسرجات لا ظمينا الغمام يوردنا

والوعد لا رفرف البارق على راس الطويله
والهواجس تصطفق وغزيل السابق تحنا

درهمي بي ياذلول الشعر صوب المستحيله
إن كسبنا الصعب وإلا كسبنا قولة فعلنا

شاعر شاف الجدي في رمسته راعي طويله
والهبايب تنفض غصون الشجر منا ومنا

والزمن جافيه عقب الطيب من قبل أمس عيله
والوجيه اللي خذن منا الغلا ويش عطنا

والوفا يلهث ورا بيبان نساي الجميلة
سج ما كنه شرب من كفي الطيب وتهنا

أي عناله ويعنالي ويعنيني ويعنيله
عالق علق معاليق العلايق واعلقنا

عقب اللي يوم ضاع وضيع الوالي دليله
جا يحدنه عيون اللي على الضيق يحدنا

روح يدفدف مع السارين بضلوع نحيله
عقبها عود يلوج لسينه حناوحنا

يتطاولنا فقير الحال مغتر بقليله
ما درى انه لو تعنا للثريا ما وصلنا

علموه يرش مقياله ويشرب من صميله
ماله عظام يشيلنه عشان يصادمنا

انصحيه وفهميه وسولفيله واشرحيله
انتي اخته علميه ان الوطن هذا وطنا

ياحبيب للصمايل قلب وضلوع جليله
استرح يالاجودي شوري عليك ولا تعنا

ما نوردها على الجمهاه بعزوم هزيله
يوم جينا عزوة يصفق لها الموت وتثنا

أبشري يا عزوتي لا حزم الصايح شليله
والله ان أسوقها شلفا في تجغم من زعلنا

وأبشري باللي يشيل الحمل عنك ويرتكيله
شاعر بأسمك تغطرس باسمه الحرف وتغنا

والعذارى اللي يشبن لا سمنا الوضاح ليله
جعلهن لا قصرن بيض الفعايل يفقدنا

لا وطينا القاع شوف القاع منهي تنحني له
ما هدر وأطبق على روس الجمال إلا جملنا

والوعد لا رفرف البارق على راس الطويله
والمشاعر تشتعل وغزيل السابق تحنا

© 2024 - موقع الشعر