تهليله وتكبيره - ناصر القحطاني

تطمن ياقصيدي مالك إلا العز و النوماس
من أيام النبي والشر ما تسكت مزاميره

تجملني مثل صفرا إلى لزت تجيب الكاس
وانا لك وجه عز ٍ تطبق العز بحذافيره

لك الله لا جروحٍ تنزف ولا خاطر منحاس
هذولا مالهم غير الشتيمه في البلد سيره

هذولا مجدهم زايف .. هذولا عرفهم دساس
هذولا حولوا ضحكة بياض الطرس تكشيره

هذولا لو اقول ان البحور تكذب الغطاس
عطى كلٍ شعيب وضاق جوّه .. يالله الخيره

سماسرةٍ على روس السنتهم فلسفه وافلاس
ياشين المفلس اللي لج خلق الله بتنظيره

انا رغم انفهم راع البياض المرهف الحساس
وانا اللي دلته تسوى لها عشرين تبهيره

سقى الله ديرةٍ كانت زمان اقرب من الانفاس
غدت من ديرةٍ بانفاس لا نفاسٍ بلا ديره

سقى الله يوم ذبينا مراقيب ورا مكناس
وقف سلمان بن عبد العزيز ولا وقف غيره

ورحت اصدح بصوتي والزمن خلفي يدق اجراس
وافضفض للتراب اللي يفضفض لي باساريره

واطوّل قامتي و أوقّف التاريخ راس براس
واقول ان ماتوا اهل المجد ما ماتوا مداويره

عسى الله ما يبارك في القلم لا راود القرطاس
وهو في داخل حقدٍ دفين وحسد غيره

تعلّق ياقصيدي بالنجوم وشلّة الخناس
عليها من هل التوحيد .. تهليله و تكبيره ..

وانا ذاك الخوي قل .. يالله الخير .. ولك النوماس
والى خان الخوي بس الخوي قل .. يالله الخيره

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر