الإحتضان

إبتسم وجه ٍ مضى له كثر ما مر الزمان
كثر ما ضاقت عليه هالسنين الأربعة

يوم شاف الحب ف عيونك حبيبي والحنان
إبتسم حظي سبب رحمات ربي الواسعة

كنت في ذاتي سجينة ضايق ٍ فيني المكان
كلما دورت حولي ضيقتي متربعة

وكنت من كثر المفارق كل همي الإحتضان
كنّ هذي الدنيا غربة والدروب مفرعة

مادريت إن خفوقك دنيا يملاها الأمان
وماهقيت إن بعيونك ألقى كوني بأجمعه

ياقصايد تحتويني خلي بقلبي مكان
للي منهو في حياتي أحد ثاني مامعه

من كثر ما هو جذبني بي كسب أحلى رهان
تتبعه كل المعاني والعواطف تتبعه

يعني قلبي صار وده يبقى في روحه عشان
لجل دايم هو يشوفه به يطرب مسمعه

بمتحن نفسي لو إني ما أحب الإمتحان
والمعدل لو هو نازل لجل عينه برفعه

إرفقي بي يا المحبة إرفقي بي بحنان
لَنّ روحي من غلاته كلها متولعة

وين ما وده يهاجر وين ما نوره يبان
ببقى حوله مثل نجمة ف الليالي ساطعة

ودي اقضي فرح عمري قبل ما يفوت الأوان
باخذ عيونه وطن لي والمشاعر أمتعة