من حدني

لـ مشعل دهيم، ، في غير مُحدد

من حدني - مشعل دهيم

يالله تعديها على خير وتصيب
من حدني أكتب خماله وعيبه

يبقى الصراحه مابها شك أو ريب
بقولها والناس كل وطيبه

الحر ما ينفع بليا مخاليب
والعقل للرجال زينه وهيبه

والسالفه ما هي بلحية مواجيب
كل على طبعه يجيبه حليبه

بعض المنابت للمراجل عذاريب
وبعض المنابت للمراجل خصيبه

رجل يبي طاريه عند الأشانيب
ورجل يبي طاريه عند الحبيبه

رجل يودي بالسواليف ويجيب
ورجل سواليفه لفعله تجيبه

رجل يغض الطرف عن جارة صحيب
ورجل عيونه في محارم صحيبه

ورجل تسد بغيبته يومه يغيب
ورجل ولا تقدر تسد بمغيبه

ورجل يغيب ويفقدونه هل الطيب
ورجل ليا من غاب محددريبه

ورجل اذا أخطى يرى نفسه مصيب
ورجلاذا أخطى يراها مصيبه

ورجل تشوف بخوته لك مكاسيب
ورجل تشوف بخوته لك غليبه

قلت الصراحه مابها شك أو ريب
كل على طبعه يجيبه حليبه

اشره وشره كان تبغي المواجيب
عط حق تاخذ حق مابه معيبه

© 2024 - موقع الشعر