لاواعذابي منـك

لاواعذابي منك يوم الزمن جار
ابا المسّره والحصيل المضّره

مدري وراك اتبّدل الدار بالدار
والا تبي قطع المواصيل مرّه

ان كان يوم اقفيت في حالتي بار
في ذمتي مانته بويا المبرّه

وان كان عذرك قدّر الله وماصار
مانيب للمقفين تبّاع جرّه

والله لا اجّنب واتّعرض للاقدار
وعلمي يجيك امع النجوع وتحّره

لو ان لك حشمه وقيمه ومقدار
مانيب في ثوبك زرار ٍ تزرّه

اللي دعاك اتّواجه الصد باعذار
يعطيك من خيره ويكفيك شرّه

الا الكرامه لادعا الماقف الحار
تراني اسما من نجوم المجرّه

يموت حبك عقب ماجاله ادوار
حتى ايش لو بين الحنايا مقرّه

ولو تشتهيك العين وتمد الانظار
والله لا احط الملح فيها واذرّه

وذاك المكان اللي لنا فيه تذكار
ليتك تجّنب سكته لاتمرّه

لا اليوم مابانت تفاصيل الاخبار
حتى يجي للخيل فالكون كرّه

انا سكّت امرار وامرار وامرار
واقصّير هلاله ورى هلال غرّه

هالحين طف النار والا اشعل النار
وانته على مشهاك والنفس حرّه