اختر طريقك - مشعان البراق

اختر طريقك .. ترى ما انته عليّ مغصوب
( اللي تبي تم ) .. يالغالي عزيز الجناب

الله مخيرك / واختر في جميع الدروب
لو كنت مانيب راضي بالجفا والغياب

لأنك لحالك على عرش الغرام محسوب
من فوق ظهر التراب وتحت بطن السحاب

لك في ضلوعي من انصار المشاعر شعوب
اتبايعك بالولاء وانت المطاع المجاب

الله مصوّرك ف( عيوني ) بليّا عيوب
يا أقرب من الروح لكن مثل ضوح السراب

العام جيت اتخطّى فالحشاء دوب .. دوب
وفتحت بيبان قلبي كلها باب .. باب

حتى استحليتني مثل احتلال الحروب
وصار الك في عالمي .. دوله وباب وجواب

واليوم ماعاد من طعنة عتابك هروب
ايوالله اشد من شلفا ابن غانم ذياب

بعد ماضاقت رحاب الارض من كل صوب
صارت على كبرها .. ارخص من جناح الذباب

شمس المحبه ليا من قرّبت للغروب
عزالله .. اني حضي ٍ بالعنا والعذاب

ياحيّ ذكرى المحبه مع نسيم الهبوب
والبعد والصد والفرقا .. ( يامال الذهاب )

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر