فـــتـــرة نـــقـــاهـــه

حبيبتي .. ياعرض قلبي وطوله
ياعيّنه من بيت نسل الوجاهه

يا ألين من الربله بليلة طلوله
في خايعٍ يرفض ترابه .. مياهه

يالباسمه ... ياالمبسمه ... ياالزعوله
ياسافهه من يخلقون السفاهه

ياالمبدعه ... ياالواعيه ... ياالملوله
ياالمومنه ب أن التغلّي .. تفاهه

ياالمرهفه ... ياالواضحه ... ياالكسوله
ياعقلي .. وسجّاته .. وإنتباهه

مشتاق لك شوق الشقي للطفوله
والوصل عقب الشوق .. فترة نقاهه

والشوق يلعب بالنفوس الخجوله
لعب الضنون السيئه .. بالنزاهه

والحب .. شوق .. ووصل .. وأشياء حوله
لاضيّع المشتاق درب أتجاهه

حبيبتي لي بيت دايم أقوله
لا جر قلبي كل ماأشتقت .. آآآهه

مشكلتي إني ما أحب بسهوله
لكن إذا حبّيت أحب بشراهه