انا عليكم ياهوايه شفوقي - مدله الضميان الجذع

انا عليكم ياهوايه شفوقي
اشفق من التاجر على جمع الارباح

شفتك وسار الدم داخل عروقي
تناشت الفرحه وشوفتك الافراح

ناظرت فالمبسم وفز الخفوقي
وبيض كما اللؤلو على عقد مسباح

وهاك الجبين اللي سوات البروقي
براق وسم ٍ فيه نو الحيا طاح

براق وسمياً خياله حقوقي
من وبل سيله سال وادي وصحصاح

وسود ٍ هدبهنه لمثلي يشوقي
بغضايهن كنه يوجه لي سلاح

والعنق عنق ام الغزال الطفوقي
اللي تجفلها ذعاذيع الارياح

وردفن يتله مثل طعس العروقي
وليا تنهض قلت ياعزتي طاح

وجدايل ٍ فوق الردايف فروقي
ذيل الصويتيه ليا صاح صياح

هذاك خلا فالضماير فتوقي
وجرح فوادي مامعه موس جراح

خلاني اسهر لين حتى الشروقي
واجاوب الورقى بصوتي ليا ناح

وهبه من الخالق وهبهامخلوقي
وانا بليت بحبها كيف ابارتاح

© 2024 - موقع الشعر