تضايقت وبكيت - مدغم أبو شيبه

لايغرّك حجب دمعي عن ظهورة
لاتقول أنّي سليتك .. ماسليتك

دايم أستر دمع عيني ستر عورة
والاّ أنا ياما تضايقت وبكيتك

أوّله يوم الغلا فأربع شهورة
وآخره في يوم جيت ولا لقيتك

أعتبر مسياري لجارك.. ضرورة
لجل أوقّف موتري قدام بيتك

وأنتظر لي ربع ساعة.. عند سورة
ماخبرت أن دخلته.. ما أحتريتك

وأنت تأخذني على عميا مشورة
مسرفٍ بي لارحم حيّك وميتك

تحسب أنّي ناسيٍ حبك ودورة
لو نسيت أبوي وأمّي مانسيتك

الله اللي حطّ لك في العين صورة
والله أن يمحا نظرها مامحيتك

تلمحك روضٍ يقلدني زهورة
ناعمٍ لو أنّك بتوكل كليتك

موج حبك في الحشا صفقه وفورة
والظنون تسد نفسي لأشتهيتك

وش تعللها عليه من الخطورة
يامعللها على ليتك وليتك

واحدٍ من طاري أسمك طق زورة
وش يقول أن سمع لبيك وفديتك

عذره بمخباة لو يفقد شعورة
وأنت عذرك لارماك الله رميتك

لاتهز الغصن وتطيّر طيورة
أتق الله وأحترم مجدك وصيتك

وأن حداك مساير النفس الغيورة
مرحبا من واحدك لكمبليتك

أرمني فالنار من عميا مشورة
وأسرف أسرف لارحم حيّك وميتك

© 2024 - موقع الشعر