اتوب

لـ محمد عويضه، ، في غير مُحدد

اتوب - محمد عويضه

ذات القوام الفارع الممشوق ذباح القلوب
تمايلت قدام عيني قلت :يادين النبي !!

فيها دلع بنت الشمال وكبريا بنت الجنوب
ماقول كلي هام فيها .. للأمانه أغلبي

هذيك لامنها مشت باست خطاويها الدروب
وتقول تحت أقدامها (فديت ماطاك أرحبي)

قمت أتهجى حسنها اللامنتهي من كل صوب
كني طفل قام يتهجى ترجمة فيلم أجنبي

مرت تقل كنها تقود الغيم وفلول الهبوب
وإليا تقفتها الهبوب بظهرها قمت أحبي

تلعثمت فيني المشاعر آتثيقل ثم أذوب
عجزت أعبر باللسان وقمت أعبر بركبي

كنها تعذب من يناظرها وهو يصرخ : أتوب
لا بارك الله في اللثامات الجديدة والعبي

بنت أغنيا مصبوب فيها العز والهيبه صبوب
متغطرسه تاخذ قبل لا يسئلوها وش تبي

تمشي وتملاها الثقة في نفسها ماهي لعوب
عزي لحال إللي يقول : أقدر لها .. لأنه غبي

والله لو صب البحر الأحمر لها في وسط كوب
من بعد ما حلاه ثم سواه شاهي مغربي

ماطال منها مايطفي جمر في جوفه شبوب
عزاه له يمشي وراها حاله بحال الصبي

(برج العرب) لو شاف ماشفته بها وقت الغروب
بيقول : ودوني (الخبر) والله ما أقعد في (دبي)

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر