ادعج غنج

سبحان من سوى الاوادم من الحور
انا اشهد ان الله هو اللي يسوي

زولٍ خلق من نور وبخدته نور
نورٍ من الخالق ماهو نور ضوي

ادعج غنج خده به الملح منثور
تقول بدرٍ بان بفتوق نوي

وعيون تذبح بالهوى كل منعور
سودٍ مضاليلٍ على القلب سوي

نيشانهن رمانة القلب ياسرور
وحرابهن من عرق جوفي تروي

هو مسرفٍ فيه وانا فيه مجبور
حبه ملى قلبي وجوفي وجوي

من زود حبه كن كل البني عور
لاغاب عني قمت ادوج واهوي

ابوجديل اشقر على المتن منثور
واهني من بيديه فيه متلوي

ان كان شدو يم وسمية الثور
واحسرتي لاقالوا البيت طوي

وان مت من مركوز الانهاد معذور
اللي عليه هالزمان متكوي

ولو هو عطاني صاحبي كبر الاظفور
قلت الدواء منك وعلى الله بروي