ضاق صدري

الطيش عذرك ! والمقادير عذري !
والفرق واضح واقطع القال والقيل

ما ضاقت الدنيا ولو ضاق صدري
كذا !! مدام الضيق اصبح تساهيل ؟

صابر عليك ولا نفع فيك صبري
يعني عن اذنك ما بقى فالصبر حيل

صديت والصده تعلمك قدري
البُعد يكشف ويش قدر الرياجيل !!

بسري لا تسألني على وين ؟ بسري
دام السهر لجفون عيني مداهيل

لا تقول سامحني ولا تقول بدري
بدري من اعمار الخبول المهابيل

الليل يغري ! وانت طعنتك تغري !
والقاف وش يبغى سوى ( طعنه و ليل ) !!

بآجر صوتي وانطرب دام فكري
زعلان من جيلين راضي على جيل ؟؟

وقصيدي اللي كبّره صغر عمري
يسوقني للمجد سوق الفناجيل

يطري عليّ لا ضقت ولا انت تطري
كل ما طرالي الدمع ! واخذ التفاصيل :

الدمع : ماهو ( ما ) أهله ويجري ؟!
الشاعر دموعه قصيد ومواويل !!

بكيت لك ( بيتين ) وابيك تدري
ان الشعر منها غدى دمعه يسيل

ما عرّف اوراقي على طيش حبري
الا : رداة الحظ و العشق والويل

ولا ضيّق الدنيا وسط ( عين شعري ) ؟؟
الا غدر نسل الرجال المشاكيل !!