إن عشت يا راسي.. كسيتك عمامة

إن عشت يا راسي.. كسيتك عمامة
وإن مت يا راسي.. فدتك العمايم

يا راس.. شيبك.. ما بدا بك مذلة
والشيب.. تكرم به.. كبار اللمايم

الأجواد.. يكرم شيبها.. في مشيبها
نقالة القالة.. محوص الصرايم

يا ما نطحنا.. في الصبا.. من قبيلة
يوم الصبا.. والرمح.. للكيف.. رايم

وياما.. خذينا.. تونا.. من كسابه
بسيوفنا.. راحت تقسم غنايم

وياما.. نسفناهم . على جال وادي
وياما.. نحونا.. فوق سود الشكايم

أربع مية خيال.. جونا مسيره
جونا.. يبون الغرس.. حلوا الطعايم

وقالوا: يسار الغرس.. والا.. يمينه
أمس لكم.. واليوم.. جا.. فيكم سايم

وقلنا لهم: من دونه الموت.. حامي
اليوم.. نهدي الروح.. نخشى اللوايم

وثنيتها.. لعيون.. غرس بكاير
يثمر بهيبتنا.. غصونه نعايم

واخذت اطاردهم.. وانا فوق قلبا
مثل الهدود اللي عن العشب.. صايم

تلحق ليا غارت.. ولا ينلحق بها
شقرا.. ولا ضريتها.. بالهزايم

من يوم بان الفجر لين اعتلى الضحى
وحنا.. نقلط.. للمسير.. عزايم

والله عطانا.. منصب الحق والظفر
يوم التقت.. بين القروم الولايم

يوم اسلموا للمنع.. واسندت عنهم
ليا هم.. كما عشب.. لفح به سمايم

هذاك أسير.. وذاك يومه.. دنا به
وهذاك مكسور.. وهاذاك.. شايم

هذا زمان فات.. ما ينفع المنى
يوم اذكر الماضي.. تزيد العظايم

الراس شاب.. وثالثة رجلي العصا
والله.. يوقظ قلب.. من كان نايم

وأنا ابن سرار.. علومي قديمة
محا عسرها.. طيب الليالي القدايم

وأنا في رجا عمر.. وعمر.. ورا الشفا
عسى ليا جانا.. ترد اللزايم

لعل.. قبل الموت.. نسمع بشيره
بجاه.. من حييى العظام الرمايم

وصلاة ربي.. عد.. ما ذعذع الهوا
على النبي.. وأصحابه أهل الكرايم