وان باعوا الشيمة
ان صار زود المال بيدين الانذال
حنا من المعروف تندا يدينا
وان كانهم شرهو على طيب الافعال
حنا وردنا جمامها وارتوينا
وان فكر وللجود يمشون رحال
حنا قبل يمشون يمه خطينا
ياما لبسنا للشرف كل سربال
وعلى البسيطه للفضيله مشينا
في دوحة العربا لنا مجد وظلال
وحنا على در المكارم غذينا
لو نجمع اللي فات منا من المال
ان كان شيدنا القصور وبنينا
نعطي ولا نتبع عطانا بالاقوال
ونبذل ونسكت كننا ما عطينا
وان باعوا الشيمة بدينار وريال
حنا دخلنا سوقها واشترينا
نطلع لها لو هي على روس الاقذال
لو هو عسير دربها مانثنينا
بافعالنا نرسم دروب للاجيال
إلى نساها غيرنا ما نسينا
اسود سادات تسجل للاشبال
فضايل شمنا لها واهتدينا
بيض نسجلهن جديدات وسمال
حفايظ لاحفادنا اللاحقينا
نصبر على الشدات لو شيلنا مال
لو سال دم ادفوفنا ما شكينا
نخاف يلقى سدنا كل ختال
ويبني هزيلات المعاني علينا
الليل يا خالد على والدك طال
وهنيت ناس بالكرا نايمينا
ياعز راسي شفت ما خبث البال
شيء يهول شيب الجاهلينا
شي من اسبابه يشيب بالاطفال
فطر خشوم مهجرعات الحنينا
ادير قالات عريضات واطوال
قالات خلن المخفي يبينا
منهن رزين العقل بالوقت يهتال
بوقت عبوس فطن الغافلينا
وقت من اسبابه شكاكل ريبال
نصبر ونسكت كننا غايبينا
الناس بالايام راحل ونزال
وتفجعهم الدنيا وهم دالهينا
وحيات رب نزل آيات الانفال
عالم خفايا نية الحاقدينا
ما اترك طريق العدل في كل الاحوال
لو يرحل المريخ للفرقدينا

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين