اخترت بعد الدار عن قرب الانجاس
قالو وحيد وقلت ما عندي اوناس
وقالو غريب وقلت بارض بعيده
ابعدت ما بي شوف ناس من الناس
بعدت عن بعض الملا وتعديده
مطاوع قلبي على كل الاجناس
والبعد عن شوف المكاره يفيده
اخترت بعد الدار عن قرب الانجاس
عن دارهم نقلي ديار جديده
في وسط نجد اتبع هوا كل نسناس
واطرب لشوف اطيورها وتغريده
اعشق ليالي نجد لو انها ادماس
وايامها عندي جنان سعيده
شمي لعشب رياضها يقعد الرأس
وما فات من ساعات عمري بعيده
شوف الزهر يبعد عنا كل هوجاس
ويريح عن قلب الشقا ما يكيده
وحس الرعد في رايح المزن رجاس
دقات عود عند سمعي فريده
وان قال لي بعض المخاليق لاباس
قلت الهضايم بالضماير مجيده
الله من هم بالاضلاع غطاس
اقام وسط القلب وابطى شديده
فكرت بالدنيا بتقدير واحساس
ولاجت لي الدنيا على ما نريده
اللي نبي تقطعت عنه الأرماس
وعنه اختفت كل العلوم الوكيده
القلب يبغض كل غادر وبلاس
اللي يلطخ دم الاجواد بيده
واحب من يتعب على كل نوماس
ومن فيض جوده ما يمد الزهيده
اللي ليا كادت والارياق يباس
يصبر على كود الامور الشديده
وللنفس عن طرق المثاليم حباس
يتعب على كل العلوم الحميده
واحب نجد وكل حبي على ساس
حب بقلبي له قصور مشيده
عندي وعرها مع سهلها والاطعاس
غابات ورد في زهور نضيده
برياضها محلا هدد كل قرناس
ان شاف حفان الحباري يصيده
عدل المناكب لأبرق الريش دواس
ما ناش في مخلاب كفه يجيده
يا حلو هداته على الجول غلاس
ينحر كثيره ويتعدى الفريده
اجرد عديم لهايش الخرب فراس
والطايره لو ترتفع ما تكيده
ايام عجات الهدد كلها اوناس
يا حلو بالخد البياح تهديده

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين