الحر يجزع يوم توطا حدوده - محمد احمد السديري

مرقا العلا خطر عسير صعوده
ما يطلعه من لا تجلد على الكود

والبيت ما يبني بليا عموده
والحيف يزعل من عن الحق مردود

والحر يجزع يوم توطا حدوده
وتشرهه نفسه على الطيب والزود

ولا يشتكي من لا تضره لهوده
ان شاف جور الحيف والعدل مفقود

والوقت شفنا كل بيضه وسوده
وشفنا نهاره مع لياليه مضهود

والغيم لو تسمع صواعق رعوده
لا ممطر وبل ولا هوب مريود

يا مدورين الطيب قيسو عدوده
والطيب عد بين الاجواد مارود

والناس بارض الله تراهم شهوده
وحق بلا فعل على الرجل مجحود

والنذل حيلات الردى ما تكوده
واليا بغا الطولات ما يدرك الجود

عن المراجل قاصرات زنوده
طير العشا يصبر على كل منقود

الخيل ما تشكي مضاريب عوده
وبالقيض ما ركب النضا مثل صاهود

يعيش في دنياه همه رقوده
و نفضنه قرح الخيل والقود

لا عل رحمة خالقه ما تعوده
وعساه مع زمرة هل النار بخلود

هذا زمان هايبات فهوده
والناس نادو عنتره باسم مسعود

واشوف لي رجل يعدد جدوده
لو ان ابوه وجده اضعف من الدود

كلت من الما طا رواسي حيوده
والبوم شاش ولا بس درع داوود

والنيص حط لهامة الراس خوده
عقب المذله له طوابير وجنود

ما كن شيء في زمانه يكوده
شاهد بها الدنيا سلامات وركود

وحتى الغراب اليوم يفخر بجوده
والفار بذراعه قطع كل بالود

والشرى والحرمل تباهت وروده
وقامت تشيل غصونه الماس وعقود

يا حسين زانت له ليالي سعوده
وصدق حياه بزايد الوبل ورعود

© 2024 - موقع الشعر