الـــحــــديــــقـــه - مبارك الخليفه

رحت صوب الشارع اللي قبله اسوار الحديقه
عنده اول ذكريات الحب واخر ذكرياتي

رحت مدري ويش عندي رحت؟؟ لكن الحقيقه
انه اغلى شارعٍ وقّفت جنبه في حياتي

عنده اجمل ما رأت عيني من انواع الخليقه
وعنده اصدق كلمةٍ من قلبي تلامس شفاتي

وعنده اغلى همسةٍ مرت على سمعي رقيقه
وعنده احلامي وعنده عمري وكل امنياتي

وعنده اقوى طرح واقسى جرح وجروحي عميقه
وعاذلي لا شاف دمعي جعله يسوي سواتي

البكا مذموم لكن القهر محدٍ يطيقه
سامحوني ما قدرت ارد همّال عباراتي

ذا محله يوم علمني بالاسرار العتيقه
وذا محلي يوم اسولف له وانا في ايدي عصاتي

يوم علمني بقصة ذبحتي باسهل طريقه
واختفى صوته وصدري حجرش وجرّح لهاتي

ما دريت ان الوفا لا بل ريقه جف ريقه
موقفٍ ما مر في بالي ولا تفكير ذاتي

احسب ان الحب يثبت والوصل محدٍ يعيقه
واثرني مثل الغريق اللي يبي طوق النجاتي

راحت الدنيا ودارت والامل وقف بريقه
وانتهى التفكير كله ويش راح و ويش ياتي

لين جيت الشارع المذكور واسوار الحديقه
وقلت اجل بقرب من الطوفه وبكتب ذكرياتي

© 2024 - موقع الشعر