سلطان بن وسام - مبارك الخليفه

اقول لا كلمتني من موبايلها
يا مرحبا يا اعذب الاصوات واغلاها

وتقول عاد انت هذي منت قايلها
سمعت سلطان بن وسام غناها

واقول عادي بغيرها واعدلها
بيوت غالي يجوز آخذ من ادناها

وتقول ما جاز لك منها سوى اولها؟؟
انا اتحراك تبدا واتحراها

غنيت صدفه وكني قلت لك قلها
وذي صدفةٍ صار لي مده برجواها

مشاعري لك ماعرف شلون اوصلها؟
دوّر لها في القصيده ذي وتلقاها

ياللي بيوتك بكل الحب ترسلها
وتقول لي لاحدٍ يدري بمعناها

صارت رسايل وخلق الله تناقلها
واسرارنا كل خلق الله تقراها

اقرا القصيده وفسّرها وحللها
وتلقى معاناة شخصٍ منك عاناها

خلتني اهمّل الفكره وابدلها
وانسى القصيده من اولها ليا اتلاها

واظن ما كان به داعي نطوّلها
السالفه هيّنه من يوم قلناها

حبيبتي كلمت حبيت ادللها
جيت اتغزل وهي جتني من اقصاها

الجادل اللي علي رفقه ما ازعلها
وازعل جميع البشر وادوّر رضاها

اللي ليا شفتها تنفض جدايلها
وترفع طرف ثوبها ,, وتقصّر خطاها

وتسلهم بعينها لاقمت اخايلها
اقول : سبحان ربي كيف سواها

ان شفتها عفت انا الدنيا بكاملها
وان ماحصل لي فروحي عادها اياها

ترقب متى ربي يفرّج مشاكلها
وتيسّر امورها وتزين دعواها

وبعض الصواديف لو نقدر نأجلها
ما عاد به نفس ترقب غاية مناها

كل الاماني تحقق عند مملها
وانا امانيي بلحظات لقياها

لكن ما دام الوصل رنّة موبايلها
يا مرحبا يا اعذب الاصوات واغلاها

© 2024 - موقع الشعر