العوض مالا الحريمه

لا نهيت القلب عن لاماك عيّا
واعترف لي بالعوض مالا الحريمه

يا حبيبي كان شوفك ما تهيّا
لا يغيب الصوت يا مال الغنيمه

كل شي ٍ ينهضم كون الجفيّا
والله انها منك في حقي جريمه

ما يجوز انك تسوي بي كذيّا
دام قلبي مخلص ٍ لك من صميمه

الجفا ممنوع يا سمح المحيّا
والعذر مرفوض والشرهه قديمه

لا تسمّع للنميمه والقفيّا
وش تبي بأهل القفيّا والنميمه؟؟

انتبه لي من هناك اليا هنيّا
وافهم المطلوب والنيّه سليمه

شد حيلك واكرب حزامك وهيّا
المحبه ثلثها الاول عزيمه

وثلثها الثاني يبي منك كنيّا
وثلثها الثالث نصر والا هزيمه

بس جاوب صوت من رحب وحيّا
وعقبها لا بد يقفا السيل ديمه..!!