طويلين الأشناب

لو لا الأمل ما عاش فينا مساكين
ولو لا ألوفا ما ينعرف قدر الأصحاب

وأيام عمرك يا فتى بين يومين
للطيب ولا للردى علمك يجاب

أن كنت فالعليا تحوز النياشين
وعْلى الدروب الغانمة نلت الألقاب

أبشر بعلم ٍ ما تخالف به أثنين
وأبشر بحبٍ يسكنك بين الأهداب

هذا نصيب اللي على الخير ماشين
اللي من قلوب البشر دايم أقراب

والرجل ماله عن طريق الميامين
أن كان للجزلة شغوفاً وطلاب

وعليك باللي لا تماروا الشياهين
يشّوش رأسه للمدايح والإعجاب

يسعا لكسب ألمرجله علمٍ ودين
باعه طويل وفي المهمات كساب

رجلاً ليا صكوا عليك المعادين
وتسكرن دونك مغاليق الأبواب

ينشد ظهرك به مع العسر واللين
له موقفٍ صامل وفي الحرب شبّاب

هذا الصديق اللي يقديك لزين
والفخر في صحبة طويلين الأشناب

وعلم المراجل ما يجي في مواعين
علمٍ يورث من تواريخ الأنساب

وللحب في قلوب الرجاجيل دربين
للخير درب وللمحبة بعد باب

ولا تعشق إلا بنت طلق الحجاجين
النادر اللي كل ربعه له أحباب

أن عشت تلقى بذرتك في الفراعين
وأن غبت يبقى لك مع الناس مرقاب

والشوق ضامر في قلوب المحبين
وكم شاجع ٍ قبلك من الحب ما طاب

راحت حياته في رجا كاحل العين
وأمسى عليل من الهوى كنه مصاب

هذي علومي لك قبل تاصل الصين
ويطيح سهمك بين ربعك والأجناب