سلوم القبايل

يا زين ما في اليد ذالوقت حيله
عليك تجبرني سلوم القبايل

أدرا عليك من الخطا و الفشيله
او كلمةٍ تجرحك من قول قايل

صارت ظروفي في عطاها بخيله
و اشوف لحظات السعادة قلايل

انت الحبيب اللي نسينا بديله
من بد خلق الله لك القلب مايل

حبك مكن في ظرف يومٍ و ليله
حبٍ ينافس حب شمّر لحايل

و لما تسلهم بالعيون الظليله
يضيع عقلي عاد عيني تخايل

ما يقتني الخيّال كود الاصيله
والمشكل إنك فوق كل الاصايل

في ذمتي لو شوفتك مستحيله
إني على شانك لسوي الهوايل

قد قالها العراف يوم اشتكي له
في ساعةٍ فيها عظامي نحايل

(غيمٍ بعيدٍ عنك لا تستخيله
لا صار ما سيله بواديك سايل)