اشراقه

لـ فيصل بن طواله، ، في غير مُحدد

اشراقه - فيصل بن طواله

كفي اللوم..مثلي مايفيدك عتابه
مايفيد العتب يا الغاليه والجدال

داوي القلب وإلا..لاتزيدي صوابه
مثل ما اعطيك فرصه..اتركي لي مجال

أبتسم لك..وقلبي ممتلي في عذابه
خفة النفس راعيها..يشيل الثقال!!

وش تبين بقصيد الشاعر واكتئابه..؟
ليه تستبدلين فراق همي وصال؟

آه من هالشقا اللي حط..فيني ركابه
كل ما اطول الونات..صابه جفال!!

واقعي للأسف كله ذهول وغرابه
إن كتبته حقيقه وإن قريته خيال

عايش بين غربان الخلا والذيابه
البلا في "جنوبي والمواجع شمال"!

كن بعضي ضما..والبعض الآخر سرابه
أطرد القيظ..مايركض وراي الضلال؟

شوفي الشيب فيني بعد ضيعة شبابه
شيخ قوم جلس للقوم يرعى الحلال!

يلعن الفقر لامن كشر الجوع نابه
ويلعن الجوعىلا منه عوى بالليال

ويلعن الذل لامنه عشى بالمهابه
ويلعن الخوف لابرك فحول الرجال

كنت أعرف السؤال ولا أخاف الإجابه
ومن عرفت الإجابه صرت أخاف السؤال

رغم هذا..ورفم الوقت هذا..ومابه
هذا أنا حر نفسي رغم كل اعتقال

كل مالان راسي..أرجع أكثر صلابه
قبل ماشد حيلي أرخي الأحتمال

ينطوي ياس قلبي..مايموت الرجابه
أشرق بشمس باكر لا طواني زوال

وآتضايق..وتاسعني حياتي رحابه
وأشرب المر من وقتي على أنه..زلال

صرت للبعد في زحمة زماني قرابه
كني أقرب بعيد..وكني أبعد محال

يا أحزن من العقيمه..وأطرب من الربابه
يمكن إن العزا هذا وراه أحتفال

وكان مالي..على كثر البطولات لابه
والله إني لا خلي للبطوله عيال!!

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر