الطنيه

لاتعتذر..رغم الذي منك لي صار
ماصار شي..وللسوافي نواري

النفس "شيهانة"على كف صقار
صيد الخطأ..يشبه لصيد الحباري!

بعض البشر..قبل الخطأ يبدي أعذار!!
وبعض البشر..يخطي ولا هو بداري!!

الحكي"سلعه"ناقل الحكي سمسار
بياعها..يا ابيض الوجه..شاري

والزمل..ماعمر اعترض دربه حوار!!
وماهي دروب..اللي بليا أناري!!

واكبر غبى..رقص الفراشه على النار!!
بالذات لا من صارت النار..ناري!!

ةألا أنت"حر" ماكرك راس سنجار
خابرك ماصيدة يمينك..خضاري!!

توفي..ليا من خانت الكف الاشبار
مثلك..لقوس(المعضله) خير باري

والقدر دار..ولك معزه ومقدار
وماني ذليل..وصدر شرواك داري!!

ماثار دمي..في عروقي ولو نار
عمر الندم ماحاف سيفه قراري

حياي في وجهي..حمام وطار
وإن طار ما والله يجاوز مداري

والله لو رزقي على روس الاشجار
مدة يميني..ماتشاور يساري!!

وإن ضاع حقي في مشاريه الأقدار
مابي ولا واحد يرد اعتباري !!

لو ما العزيمه..ما أنولد فيني إصرار
والذيب.. ماهو ذيب لولا المساري!!

وإن عودت يم السوالف والاشعار
يكفيني أسكت..ويتكلم وقاري

ولو الحقايق..تنفض غبار الاسرار
والله لتصرخ"طنية"بالصحاري!!