عفى الله عن ما فات - فواز الهفتاء

عفى الله عن مافات ياغايتي ومناي
ابفتح معك صفحه جديده على شانك

ولاعاد رايح وين والا منينك جاي
خلاص انتهت قصة عذابك وحرمانك

ابى اصير لك دنياك وتصير لي دنياي
حرام ٍ عليه حرم لاشتت احزانك

يكفيك ماشفته مع الوقت لجل ارضاي
ويكفي دموع ٍ ساقها محجر اعيانك

على مواصلك ياروح روحي قطعت الراي
ابرويك حب ٍ لينها تثمر اغصانك

يا اخر محطات التلاقي ويا مرساي
ابقبل مثل ما اقبلت من كل وجدانك

ولجل اثبت انك غايتي جيتك من اقصاي
ابى اشم وردك واقطف ازهور بستانك

ولامن سريتك ليل ياماحلا مسراي
امر برسومك بين حيك وحيانك

يهدل الحمام ويطرب السمع عزف الناي
وذوب اشموعك واتدفى بنيرانك

الا يالكريم اللي تسابق اخطاك اخطاي
غنيك غني ٍوافقر الناس فقرانك

انشهد شهاده رحت انا منك بالبيباي
سكرتك قبل لا ذوق توتك ورمانك

يابلسم جروحي ياسبب علتي وادواي
احبك . واحب اسمك . ورقمك . وعنوانك

© 2024 - موقع الشعر