نصيت

نصيت بيتٍ مدهل للرجالي
راعيه عن ناصيه ماقط لاذا

عبدالله اللي نظرته للمعالي
وله بالمعالي مركز مايحاذا

زعامةٍ تعرف من أول وتالي
من فيصل الاول الى الشيخ هذا

دوشان بالشدات مثل الجبالي
فيهم لمن ضدّه زمانه ملاذا

مدّاتهم عند العطايا جزالي
وهداتهم فيها هلاك ونقاذا

يردون لاجا للفتيل أشتعالي
ويثنون قفوا اللي باهلها تجاذا

وأن صبّحوا عند الحلل والحلالي
كلٍّ على منسوبه الاصل لاذا

كم نطحوهن جمعةٍ ماتبالي
وخلوا مقاديم السرايا جذاذا

بصنع الفرنجي محدبات السلالي
وشلف تلظّى من رمقها استعاذا

زحام الحريب مفرّحة كل غالي
غب الوقايع بالقلايع تحاذا

ريف الركايب سايجات الحبالي
فجّ المناحر ضيقات الفخاذا

شليلهن درهام عقب الجفالي
عمسين اهلهن والمزاهب نفاذا

متلطمين وسوقهم بالعجالي
كنّه يخل جلودهم شوك حاذا

بشتويةٍ صلف هواها شمالي
كتما ويمطر مع هواها رذاذا

يبون نزلة مكرمين السبالي
نوادرٍ بين الحمايل فذاذا

شيوخ قومٍ يحتمون التوالي
لالتم جمع الحرب عقب الشذاذا

مطير مأحصي فعلهم بالكمالي
لا جيت ابا احصي كيف واعد ماذا

ربعي رموز الطيب مابه جدالي
ماسمع سراد الناس لاذا ولاذا

ناسٍ عن الماقف بعيدة منالي
تجّار هرج بالمجالس تهاذا