مـا خــطّ القـلـم

حيّ لكتاب اللّي لفوا به مناديب
مضمون ما خطّ القلم بالسّجلّي

رحّبت به من قاصي القلب ترحيب
اعداد ما سحب المخايل اتهلّي

ولا لوم قلبٍ لتّهوه المعازيب
أقفوا وخلّوا دمع عينه ايهلّي

يشتاق قلبي كلّ من يذكر الطّيب
من صابحه ويشوف صبره امجلّي

يا شيخ تكفى من العنا و التّصاويب
خلّ لهموم أو كلّ شيٍّ ايولّي

ترتاح وان صابك من الشّوق تعذيب
يالتّيلفون اللّي حديثه ايسلّي

يدنيك من قرب الأهل والمحابيب
والصّاحب اللّي عشرته ما تملّي

اللّي رماك ابغبّة الغيّ ياذيب
وخلاّك في محمد غرامه مغلّي

بدرٍ كسا ردفه من الليّل غربيب
في ظلّ قصرٍ للحدايق امطلّي

دونه اسبور ودور فيها سراديب
ولا ظنّ للخرّيت فيها ايدلّي

عساك من وصله تنال المطاليب
بالسعد ونحوس الليّالي أتولّي

يا صاحبي لايّام فيها الأعاجيب
تدني وتبعد واللّيالي اتزلّي