محبّـي فـي بيـوتٍ

محبّي في بيوتٍ قلتها عندي عليها ضمان
خليّه ما بها معنىً يذيّر في قوافيها

تمشّى في المفاصل مثل مشي الدّم في الشّريان
وتاخذ بالمجامع م القلوب الواعيه فيها

لاهي نحت صنّاعه ولا نقشس على الميزان
تباييتٍ لها في الذّوق من يفهم معانيها

وبيتٍ في المثل قلناه له في قولنا عنوان
كذا لامثال م لامثال في لامثال نرويها

ولي من هبّ ما هيّت نسايمنا من الرّيعان
لفت بالفلّ والرّيحان وانفاح الصّبا فيها

صبا لا من ديار الغرب لا فيها ولا لبنان
لفت من ديرةٍ ترعى اليوازي في مفاليها

تقطّف روس عيدانٍ سقاها الموسمي هتّان
وتمرح في هضابٍ نابيه خضرٍ روابيها

خليّة جوّ قفرٍ مابها حضرٍ ولا سكان
سوى النّسمه تداعب نبتها والغيت يسقيها

تشيل الهمّ عن قلب الوليع العاشق الهيمان
وتبري من جروح الرّوح ما تخفي خوافيها

وهذا الفهم ما يمليه وارجو منّك السّمحان
ومن يذخر عن عيونه دواً م العوق يبريها