بــن مـبـارك

بن مبارك نبغي الرّدّي
منك يللّي تفهم أوزونه

من اعراب وتنظمه سردي
والصّواب اترد مضمونه

مثل ما عندك لهم عندي
لي غلاهم باح مكنونه

من هواه أخفّي الوجدي
جنّ مالي غيرهم مونه

لي محبّ في المها فردي
زيّ شكل الحور في لونه

مثل ذوق القند والشّهدي
المصفّى لذّة اعيونه

بو خدودٍ تخجل الوردي
لو من التفاح معجونه

له يديلٍ طاح منهدّي
فوق ردفينٍ يهينونه

في الحسن تسجد له الخردي
والظّبا ركنه يطوفونه

له محلّ في امعلق جبدي
والقلب والرّوح من دونه

عن سموم القيظ والبردي
في قصور اودور محصونه

يعل عمره دوم في سعدي
عدّ زوّارٍ يزورونه