يوم غيري سالـي

يوم غيري سالي البالي
شطّني من شطّ بي همّه

من عناه ابمهجتي صالي
دايمٍ بالوجد منحمّه

لو بغيت اكتّم احوالي
باح بي من مدمعي يمّه

هوب هيّن غير ما يبالي
به خويّك لو هدر دمّه

كفذ ما تصفج على الخالي
ولا سباب اللّي بكم جمّه

علّق المعلوق واحتالي
وامسكه بكفوفه أو لمّه

ناعسيّ الطّرف جتّالي
لي بوصله حلّ لمهمّه

تلتقي به في خلا خالي
وين لا حاسد ولا نمّه

وين لا موشي وعذّالي
غير خضل الدّوح مدهمّه

زين زينٍ ماله امثالي
جلّ من هو بالحسن تمّه

له شباب امفنّق اشكالي
فيه من تيه الصّبا زمّه

بو عيانٍ دعج وانجالي
لي سحرهن دافجٍ سمّه

واللّشافي الحمر ذبّالي
والشّهد في مبسمه حمّه

لو يراه العابد اهتالي
انحرف والصّفّ ما يمّه

ريم ما يرميه ختّالي
ذاير القنّيص من شمّه

لا تطاوع فيه نقّالي
خلّ إذنك عنه منصمّه

مرّ شربك عندهم حالي
لو صفولك صفوهم غمّه

والتزم بالعهد لو طالي
وانت روح وافي الذّمّه

الظّبا تصطاد لشبالي
والمليك اللّي ملك عمّه

ما ايّيه غالي المالي
غير لي يبغيه بتّمّه

الصّديج يطيب له فالي
والعدو ما ننقله همّه

من حيابٍ بات همّالي
وابله والسّحب ملتمّه

هلّ واسقى روس ليبالي
والسّيوح وبرّها عمّه

تمّ يري السّيل له تالي
في لبطاح مسوّيه زمّه