حسن الغواني

مرت علينا تقطع الدرب بالهون
فتنه حشى لله ما مثلها كان

صابت قلوب الناس بجنون وجنون
كل التفاته تبدى الحسن بالوان

كل الوصوف بوصف أوصافها تخون
لافي شعر شاعر ولا لون فنان

كل الوصوف بوصف أوصافها تخون
حسن الغواني بجمعه طرف تعسان

الشمس تسطع في دجي الليل شلون
سيل الشعر في وسطه الوجه فتان

لو شافها اللي بعشق ليلاه مجنون
أنكر هوى ليلى وفي عشرته خان

دنيت منها ضايع الحس مفتون
واخشى اللسان يصير في القرب خوان

لهفة وأمان وخوف وأحلام وظنون
تجمعت في لحظة بجوف إنسان

بغيت أقول وشفت أنا الموت في عيون
تقول مهما قلت أو قلت خسران

وأرخت ستار الثغر عن در مكنون
بسمه تساوي الف معروف واحسان

وقفت أودع زولها بشوق وشجون
واقفت تهز من الدلع عود ريان

صحيح من قال الهوى جنون وفنون
نظره وصار القلب عاشق وولهان