سر ياقلم والصدر يمليك مالاق

سر ياقلم والصدر يمليك مالاق
نوادر تجلي عن الخاطر الضيق

إنجاب فكر ٍ جاب مالاق الأذواق
لياهام حلق في سما الشعر تحليق

ماجت له الفكرة على بيض الأوراق
ولا قام يستعرض عليها الطواريق

واللي خذن من رونق الشعر روناق
بنات فكري فوق بيض اللواهيق

عقد ٍ جمع در ٍ لمع فوق الأرناق
تغار منه نجوم ظلما الحناديق

من فيض فكري والضماير والأعماق
يشوق ترنيمه هل الشعر تشويق

ويشوقني وأسوق من ضيقي شياق
تصريف هم مال كونه تفاريق

مير أدن لي ياسعود مايجل الأغلاق
هات الدلال وروق الكيف ترويق

ياسعود عد مهيلٍ يبر الأضياق
تراي أعي مع خنة الهيل وأفيق

يصيح في راسي زعانيف وحماق
ليا شفتهن فوق المناره مدانيق

والنار تومي ضاحها ضاح لهاق
عقب أدبحن يم المغيب المشاريق

كن الهوى لأقرى على النار سراق
ليا قام ياخذ مع طرفها تساريق

ونجر ٍ تهيض له المشاعر والأشواق
ياسعود ياخذ بي ضبيحه غداريق

لأدوى بثلث ٍ فأخر الليل غساق
ينعش ضميري نعشة العرق للسيق

وأنا هواي اللي لهن خاطري شاق
رسلانتين ٍ من طوال المعانيق

لازل شقراً للمطاليق معشاق
ملموسة ٍ بالنار من دون تحريق

منها خنين الهيل لاخن عباق
فالراس يفتح للطواري فناتيق

وإن سيق فنجاله على الكيف ينساق
مافيه لاخله ولافيه تبريق

هذا وأنا اللي للشواهيق عشاق
والرجع نجع البدو والوقت ماشيق

أقولها مانيب لا قلت فهاق
لاشك يبغا المجد حظ وتوافيق

في نجد مايمسك للأمجاد مسباق
ألا عديم ٍ حقق القول تحقيق

من راس من يفصل عن الروس الأشناق
في ضف قوم يحتمون الملاحيق

ألآد روق اللي للأمجاد عشاق
شيخان نجد معوقة كل عويق

خلو دويش مطير للشرق شراق
وأقفا يهل عبارها عقب ماسيق

وبن رشيد اللي تومر ورى ساق
عقناه بخشوم الرماح الزواريق

لين إنكسر من عقب عقناه وإنعاق
وأقفا يبي منا السلامه تشافيق

وعلى طلال يشالق الروس شلاق
العام يوم يرفرفن البواريق

يوم إنجلع مع فتقة الصبح فتاق
والموت جا لرعود نوه تصاعيق

لين أنكفوا من عقب مكفا ومدلاق
وتفرقت جمعة هل الجمع تفريق

راحوا مثل صيد الخلا طرد ولحاق
تذايروا عنا مثل شرد الهيق

من ضرب هندي ٍ للأرواح زهاق
سيف طعونه في عدوه مغاميق

يتلونه اللي للفخر ساقهم ساق
شيخان روق مبعدين المراميق

برهاف هند وسرج سابق وسباق
وزرق الرماح اللي ندبهن مزاريق

وشلفن زما مع دربهن كل شوهاق
ماعيق مضربهن عن الروس ماعيق

في نجد حنا متيهة كل مفواق
سحج البكار مولعات العشاشيق

يازينها في سهلة ٍ روضها باق
فيها يهز النود روس الزماليق

ليا رايعت حيرانها خلف الناق
وقامت تعوج بروسها للمساويق

وليامشن قامن يزومن الأعناق
مافي بعضهن عن بعضهن تفاهيق

خلاقهن من جوهر الحسن خلاق
أبدع بهن خلاق كل المخاليق

وأنزل غلاهن في جما كل خفاق
عند الرجال اللي تهوز الشواهيق

البل تبي من عانق النايف عناق
اللي بنا لأمجاد قومه عماليق

اللي يطول وللطويلات يشتاق
شامان بن هايف عريب المعاميق

هذاك له طرف أكحل العين تواق
ودايم له أنظار العذارى متاويق

أنا أشهد إنه فالرياجيل عملاق
وأنا أشهد إنه من ركون ٍ مشاهيق

والشيخ أبو فواز حماي الألحاق
اللي رفع لرسوم ناصر معاليق

شيخ ٍ ضحى جوده لأهل نجد مشراق
في نجد يزمي مثل أبانات وطويق

وقاعد ولد قعدان حر ٍ ليا واق
يرم العشا للحايمات المحاميق

وضيف الله اللي في دجا الليل شعاق
ناره يزم لساري الليل ويويق

ضحوك سن وعنده مزوح وأخلاق
وراحات جوده بالمكارم مدافيق

وبن ثنيان الفخر محتم الساق
عنده ملازيم الوفا والمواثيق

يالبيض ياللي سلمكن حب وإفراق
بالود شومن للزحول المطاليق

جل الفخر مافي عقايدهم دقاق
ذكرتهم يوم الفخر فيهم يليق

ولا ترى الروقه هوى كل مشتاق
في مدحهم يازين نظم الطواريق

وختامها مالاح فالمزن براق
وماماه لبحور السرابه تخافيق

من عمق صدر ٍ لا تجهم ولا ضاق
يضحك ليا صكت عليه المغاليق

سلام ٍ أحلى من مناقيع الأوداق
عقب إنجلى عن خاطري زاجر الضيق