الشعر ماجينا نبيعه ونشريه
نهديه هدو للنشاما طروفه
والمدح مايستاهله غير راعيه
اللي مواجيب الوفاء ماتطوفه
والطيب حتى في دجاء الليل أهاليه
مثل النجوم البينات امعروفه
وقائد معاصير الدول جيت ناصيه
سلطان شوق العيطموس الهنوفه
شيخ الشيوخ اللي نحبه ونغليه
ويفرح به المظيوم ساعة يشوفه
سليل من داس المنايا برجليه
وفرض على الكايد مضارب كفوفه
للضد مايدراء وكلآ يداريه
والخيل لليوم الكبير امعسوفه
وحصل وراكان المسمى حضر فيه
ويام ومذكر والهواشم صفوفه
شيخ وفارس واروع الشعر بانيه
وكم جب راس امجربن عن كتوفه
وقحص الرمك ترم الفلا ساع توحيه
وأبطال من فوق السروج امحذوفه
بطل يبارز كل بطل يناديه
ماخاف أبد الآمن الله خوفه
حطم كيان الترك وأفنى دواهيه
وتشهد لتاريخه مضارب سيوفه
ودربن يبوجه يوم صكت نواحيه
حلف وباج الدرب عقب الحلوفه
ويصعب على الشاعر من الشعر يوفيه
وحق القلم يصعب على فيلسوفه
وراكان مجده وراثه من مجانيه
وعلى وريثه وارداتن وصوفه
نعم الحفيد اللي يفاخر بماضيه
ويفداه من لايعترف بمعروفه
تاريخ راكان بن حثلين محييه
وآلى وقف كلن يقدر وقوفه
وآلى دعاء يام العريضه تلبيه
مثل الحياء تبرق وترعد قنوفه
ويقدر اللي له حقوق ومشاريه
ويحتاط للخشم المعاند زعوفه
ياحضرة الغياب والمجد حاميه
عن العلوم الزايفه والزهوفه
لك القصيد اكبر من الهيض حاديه
جرمن جرت بين القبيله احذوفه
ماغير رجالن برجال يكفيه
ودرب الصلاح امرار تكثر صدوفه
وعلى اي حال اهم علمي وصافيه
ربعن دفنهم قبر الاحياء بجوفه
وسلمان له حق الزعل ويش يرضيه
وهو المعزب وانتوا أغلا ضيوفه
واللي بجاهك يابن حثلين تنهيه
عنه الشوارب والدقون امحفوفه
والرابح اللي واجبه مايخليه
وخير المواقف للرجال امخلوفه
والكون ماضاقت علينا مساعيه
ونعرف عراقيب الزمن من قحوفه
والوقت جربناه مره وحاليه
ولي الشرف في روحتي والنكوفه
أرد على عدن تصدر ضواميه
عد الروى تروى مئاته وآلوفه
ميراد من كن اشهب اللال قافيه
ولا لي على بعض الموارد حسوفه
لاهاينن قدري ولاني بناسيه
والحيف ماله حول سلطان حوفه
يفداه مثبورن دقاقن علابيه
ويفداه مغرورن كبارن دفوفه
والشعر اسوقه لين اشيب قوافيه
وندرك ولاندرك لكلن شفوفه
وقافن نهجرس به وقافن نغنيه
وقافن وراء قلبن همومه تلوفه
وقافن يوصلني منهاي اجاريه
مثل الخوي اللي نراعي ظروفه
ونعتز بالطيب وفعله وطاريه
وكلي قصيد ولاعليه كلوفه
واجزل قصيد المدح الاول وتاليه
من كل نبراسن تجلا كسوفه
سلطان بن سلمان بالفعل زاهيه
في فزعته في هيبته في مضوفه
وسلطان والنعم المؤكد مواليه
أقرب من النقطه على أخر حروفه
يانجل زحزيحن ضمن بين اياديه
الطيب كله كاملاتن صنوفه
وخير العوارف كلمة الحق ترضيه
وارض الحسد بالحاسدين ا مخسوفه
والناس كلن هيبته دون عانيه
والمدح ماياتيب من ومروفه
جاء من ضحى امس اللي تلامع هناديه
والكل باروده ودرجه يدوفه
ونعتزبه والجيل للجيل يرويه
وساس الحقيقه شامخاتن سقوفه
وزعيمنا مجده من الزور يغنيه
وعن كل تطفيفن تسارق ضعوفه
لو الكواكب صيد خطفن وتشويه
راحت انجوم امشوهه ومخطوفه
ونجمن يبن ويختفي مانراعيه
الى بداء وان غاب قلنا ذلوفه
وتدوم للقطب الهشامي لياليه
سلطان مصباح الدجاء من كشوفه
شع ولمع صدرالسماء عز واليه
الله نورن والفلك في كنوفه
لاله شريك ولاسمين يساميه
الواحد اللي نعبده مانشوفه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر - بواسطة شركة المبرمجين