لي صاحبٍ

لي صاحبٍ ما اشوفه الا تخاطيف
أحيان ولا أحيان ما اشوف زوله

أمسيت أولف فيه الأشعار توليف
وأخذت مع ذكراه صوله وجوله

وده سكن بين الحشى والشراشيف
والنفس هامتبه واحبة دلوله

هرجه يلطف مهجة الروح تلطيف
يا ليتني في كل الأوقات حوله

ما به ولا عذروب زين التواصيف
لبس الحلى والزين لبسة حجوله

الخد بارق مزنةٍ بأول الصيف
براق مزن الصيف بأول دخوله

والعنق ريميٍ بدى بالمشاريف
اوحى قوانيص الضبا يوم جوله

والجسم تعزيله على غاية الكيف
يزين مثناته ويا زين طوله

عذبٍ تحير نظرته كل حريف
محار لولؤٍ صعيبٍ حصوله

يلحق محبه من سواته تكاليف
منه الشقا والسهر ياخذ عموله

ون طمنوه بضحك والا سواليف
يسج ثم قال الخبر من يقوله

ولولا الحيا هلت دموعه ذواريف
مثل السحاب ليا تدلت ثعوله