كروش

يابيه أنا لكروش لأعطي ولابيع
قبلك طلبها فيصل وابن هادي

يابيه لو كثرت بالقول ماطيع
هل كيف تبغيني أسلم جوادي

يابيه ما يرهم على مثلها البيع
ولا يجي مثله يقوده مهادي

ماجمع أصله بالقراطيس تجميع
أصله يعرفونه جميع البوادي

باغن الى من لقموا بالمصاريع
وصاح الصياح وثار عج الطرادي

أنهج عليها وانعدي بالتراثيع
مثل الفحل لاصار وقت الهدادي

أصلها لعيون بيضن مفاريع
فوق الحنايا والسبايا عوادي

هذاك بيعه كان تفهم لها البيع
الى منهن جلبن بسوق المزادي

يابيه أنا لاأسمع جوابك ولا طيع
هرجك بمقلة ناظري والفوادي

ياسابقي ما نرخصك بالماميع
حتما ولو قيل أرفعوا بالجوادي

أبغي الى ثار الدخن والزعازيع
وحطوا على عجلاتهم العدادي

بيوما يشيب من حذاه المراضيع
حدين وحاديهن من الخوف حادي

أنطح وراء ربعي وجيه المداريع
وافك عليها دينهم والعبادي

وأنشد عني وعنها المفازيع
هو هرجنا ذا كذب وإلا وكادي

حلفت ما يطري عليه لها بيع
الى الحشر ما يفخت سواده سوادي

ما دام أنا راسي لرياح الذعاذيع
بالعون طالبها من الناس غادي

وصلوا على محمد خبر المشافيع
اللي لنا يشفع بيوم التنادي