ســــنـــيــن الـــعــــمــر - عبدالله عتقان

سهرت مع هاجسي والعين عيت تنام
اراجع أيام عمرٍفات وأرتدها

ولقيت عمري وصل سبعة وعشرين عام
بالشهر واليوم والليله كمل عدها

بين الشفا والعليا عشت وأم الحمام
في عاصمه يلمع البراق من خدها

ديرة هل السيف والحكمه عيال الإمام
املوكنا اهل المواقف من على جدها

تسعة عشر عام من عمري قضت ياسلام
أتروم نفسي طريق الحب واردها

والا البقيه رمتني فالهوى والغرام
ابني علاقات حب وعشق واهدها

كنت احسب الحب كلمه مثل باقي الكلام
اقولها لي شخص وانتظر ردها

إن كلمتني صبيه قلت هذا تمام
لابدها معجبه بالشكل لابدها

وإن عاتبتني وقالت روح هذا حرام
أقول ذي ماتبيني ليه؟اقف ندها

ابغى اتقدم لكني ضعت بين الزحام
طاوعت نفسي كثير وجاوزت حدها

عايش مع الناس والخطوه بعكس النظام
موجة بحر جزرها غطى على مدها

واليوم قلبي صحى من غفوته واستقام
امشي بدربي عدل والعين مالدها

خلاص ياحب فارقني ومسك الختام
دور على ناس غيري جيبها ودها

ياحب عمري وصل سبعه وعشرين عام
يعني سنين السعاده كيف نرتدها؟؟؟

بواسطة : عبدالرحمن السلمي
© 2024 - موقع الشعر