السفر

لـ أمل المرزوق، ، في غير مُحدد

السفر - أمل المرزوق

ملامح امتزج فيها شعور الخوف والغربه
وجوه ٍ ضايعه تبحث عن الغايب بوسط الناس

لقيتك بسمة أطفالٍ تحيه بارده صعبه
لقيتك دمعة فراق ٍ وفرحه بارقه كالماس

وقدامي لقيت أكثر بلادي الغاليه الخصبه
تودعني مثل أمي وتحضني بكل احساس

كفايه لا تنادي زود أنا جيتك بكل رهبه
بجي لك يالسفر ألحين وبيدي شنطتي واكياس

وخاويتك يا غيم الدار أسولف لك عن الصحبه
عن اخواني وأحبابي وديره تاج فوق الراس

عن بحور الهوى فيني ونخل ٍ عانق التربه
عذاري ايييه لو تدري عذوبتها بلا مقياس

وقبل انهي سواليفي قطعني صوت كالحربة
سمعت أرض المطار تقول: ي عالم دقوا الأجراس

(أمل) حطت بديرتنا وجاني طير مع سربه
خذوني فوق هالجنحان بعد ما زارني لنعاس

بهالديره عرفت الحب من قشوره إلى لبه
تذوقه بنبضاتي وتلذذته بطعم الكاس

قضيت أيام ما توصف هوى قلبي بلا سبه
بعد ماكنت في ظلمه ضوى حبه كما نبراس

ملا لي دنيتي بنوره وضماني أنا بقربه
وحسسني طوال الوقت إني شمعة الجلاس

وجا وقت الوداع، أحيه ماطيقه ولا حبه
حملت الذكرى الحلوة وطيبة ناس ما تنقاس

بعد ماكنت مشتاقه لأهلي، ديرتي العذبه
تراقص في حشاي شعور وأصبح خافقي محتاس

أبي أمشي وأبي أبقى أبي شرقي وأبي غربه
ولكني مسحت الدمع وسرت بدربي للا ياس

© 2024 - موقع الشعر