الاهمال .. والتفريط

انا احسب حساب الكل ماحب الأستبساط
ولا داني اهل الكبر والبخل والتقنيط

ولكّن حظي غاب عنّي معَ المقلاط
وانا ظالمه في الأمتحانات .. بالتفقيط

فرش لي ذهب .. ثم ورد .. ثم زلّ .. ثم بساط
ولا شاف مني غير ... الأهمال والتفريط

اضيع عمل حظي بالأهمال والأحباط
وتأبطت منه .. وقال : ماينفع التأبيط

وخسرت الدبل والفرق كله ثلاث ابناط
ولاعاد لي خطّه .. ولا عاد لي تخطيط

ربطني هوى خلّي .. رباطٍ وراه رباط
وانا حالفٍ ماجفاه لو راح جفني .. خيط

ولا انشاه لين ( طريف ) ينزل بجنب (الغاط)
(وبغداد) يصبح في ضواحي ( خميس مشيط )

واذا ماحصل لي .. قربوا طاقة المخباط
اموت وتروح الروح .. وجعله ( مراح مقيط )

والاّ ... عطوني جركل القاز والمشخاط
وخلّي عليه .. الصبر .. والقبر .. والتحنيط

حبيبي فريقٍ .. يصدر امره على الظباط
عطاه الله السلطه ... وسلّط علي تسليط

لقيته صلاة العصر داخل على الخياط
على الحجتين .. امّمشطٍ قذلته ... تمشيط

تعال اكتب اسمه داخل القلب ياخطاط
تبصّر .. ودقّق .. وانقشه .. واضبطه تظبيط