سجه

أسج عنهم وأنت ماعنك سجّه
واسباب عنهم سجتي ... سجتي فيك

ياللي خطاك ألقاله الفين حجه
وارجع بدل مانيب زعلان اراضيك

لو بأتوجه عنك وين أتوجه
ما دمت من وين اتوجه ملاقيك

وما دام قلبي صادق الحب خجه
وش لي بهم مادامني ملك أياديك

في مسمعي همس العواذيل صجه
الله يلوم اللي يلومون مغليك

وأنا ما نيب أطير مع كل عجه
ولا تشربكني بالارض الشرابيك

حرٍ طليقٍ وين ما احب أوجه
وملكتني ملك العبيد المماليك

معاد به ( يامنجي الطير نجه )
الطير قد حريته سجته فيك